शिबिराची प्रमुख उद्दिष्टे

1.  वेदान्त परंपरेतील आद्य प्रस्थान असलेल्या उपनिषदांचे तात्त्विक आणि आध्यात्मिक स्वरूप अभ्यासकांपर्यंत पोहोचवणे.

2.  स्वतंत्र सत्रांमधून दहा महत्त्वाच्या उपनिषदांची तोंडओळख करून देणे.

3.  अद्वैत-वेदान्ताची मूलतत्त्वे, महावाक्ये, आत्मा–ब्रह्म तत्त्व यांचे सूक्ष्म विवेचन.

4.  शास्त्र-अध्ययनासाठी आवश्यक दृष्टी, अभ्यासपद्धती आणि चिंतन-मार्ग यांचे मार्गदर्शन.

5.  शास्त्रसंवाद, प्रश्नोत्तर आणि चिंतन-सत्रांतून अध्ययन अधिक सजीव करणे.

अभ्यासरचना

1.  शिबिरामध्ये प्रत्येक सत्रात एका उपनिषदाचा परिचय, त्याची ऐतिहासिक पार्श्वभूमी, मुख्य मंत्र, तत्त्वचर्चा आणि उपयोजनीयतेचा विचार केला जाईल. 

2.  अभ्यासकांना पुढील अध्ययनासाठी मार्गदर्शक दृष्टी व संदर्भसूची उपलब्ध करून दिली जाईल.

3.  सत्रांमध्ये प्रामुख्याने ईश, केन, कठ, प्रश्न, मुण्डक, माण्डूक्य, तैत्तिरीय, ऐतरेय, छांदोग्य व बृहदारण्यक उपनिषदांचा परिचय अपेक्षित आहे.

अपेक्षित फलश्रुती

• वेदान्त-वाङ्मयाविषयी मूलभूत बौद्धिक स्पष्टता.

• अद्वैत तत्त्वज्ञानाची संकल्पनात्मक समज.

• उपनिषदांतील प्रमुख संज्ञा व विचारपरंपरेची ओळख.

• अभ्यासक, संशोधक व जिज्ञासू यांच्यात शास्त्रसंवादाचे सशक्त व्यासपीठ.

हे शिबिर अध्यात्म वा साधना क्षेत्रातील पांथस्थांसाठी पाथेय व्हावे एवढीच खरंतर अपेक्षा आहे.  सज्जनगडावरील पावन वातावरणांत, आद्य श्रीशंकराचार्य जयंतीच्या निमित्ताने वेदान्त-विचारांचा जागर व्हावा, भारतीय दार्शनिक परंपरेमधील आचार्य व संतांच्या हृद्गतातील वाङ्मयातील एकात्मता अधिकाधिक स्पष्ट व्हावी यासाठीच हा उपक्रम आयोजित केला जात आहे.